ભૂલો ભલે બીજું બધું, મા બાપને ભૂલશો નહિ
અગણિત છે ઉપકાર એના, એ માનવું ભૂલશો નહિ
અસહ્ય વેઠી વેદના ત્યારે, દીઠું તમ મુખડું
એ પુનિત જનનાં કાળજાં, પત્થર બની છુંદશો નહિ
કાઢી મુખેથી કોળિયો, મોંમાં દઈ મોટા કર્યા
અમૃત તણાં દેનાર સામે, ઝેર ઉછાળશો નહિ
લાખો લડાવ્યા લાડ તમને, કોડ સૌ પુરા કર્યા
એ કોડના પુરનારના, કોડ પૂરવા ભૂલશો નહિ
લાખો કમાતા હો ભલે, મા બાપ જેના નો ઠર્યા
એ લાખ નહિ પણ રાખ છે, એ માનવું ભૂલશો નહિ
સંતાનથી સેવા ચાહો, તો સંતાન છો સેવા કરો
જેવું કરો તેવું ભરો, એ ભાવના ભૂલશો નહિ
ભીને સૂઇ પોતે અને, સુકે સુવાડયા આપને
એની અમીમય આંખને, ભૂલીને ભીંજવશો નહિ
પુષ્પો બિછાવ્યાં પ્રેમથી, જેણે તમારા રાહ પર
એ રાહબરના રાહ પર, કંટક કદી બનશો નહિ
ધન ખરચતાં મળશે બધું, માતા પિતા મળશે નહિ
એનાં પુનિત એ ચરણો તણી, ચાહના ભૂલશો નહિ.
No comments:
Post a Comment